عمر امين اصغر اخوته وهو دلع و ضحكة البيت، كان محبوب من أصحابه جدا
عمر اختفى قسريا يوم 7 يونيو 2019، وقتها كان في آخر سنة في كلية التجارة وكان فاضل امتحان آخر مادة التخرج، لكن من وقتها وحياة عمر واقفة 2700 يوم عدوا من #الزمن_المسروق من عمر وأهله ولسه الوقت و الزمن بيمروا من غير ما يعرفوا مكان أو مصير عمر.
اخت عمر توصف لنا ان من يوم اختفائه وكل حاجة ناقصة في البيت وحياتنا واقفة، رحنا سألنا عليه في السجون وعملنا توكيلات للمحامين، وكنت بروح مصلحة السجون اسأل عليه حتي اخر مرة مدير المصلحه اذاني اوي وخلاني اروح معيطة بقالي سنتين مروحتش مصلحة السجون ، نفسي اعرف عنه اي حاجة بطريقة شرعية أو غير شريعة .
آخر يوم كان وسط أهله كان تالت العيد، والبيت مليان فرحة وزينة وبلالين نزل يحجز قاعة افراح مع صديقه ويومها مرجعش البيت، وقتها الأسرة مكنتش عارفة المفروض يعملوا ايه بس اول حاجة فكروا فيها انهم يدوروا عليه في المستشفيات والأقسام، لحد ما وصلهم خبر انه محجوز في أمن الدولة واسبوعين وهيطلع ويرجع لاهله بس المقابل ان محدش يتكلم ولا ينشر حاجة عن اختفائه. لكن من وقتها إلى الآن لم يتم التعرف عن مصيره أو مكانه.
اسئلة كتير بتشغل بال أسرته كل يوم من غير إجابة، هو عامل ايه وهل محتاج هدوم واكل ولا لاء؟ طب بيعمل ايه لما بيجيله رمد ربيعي في عيونه؟ وهل لما يرجع بعد كل المدة دي كلها هيستوعب كل اللي فاته من أحداث؟ اخوه اتجوز اخته سافرت ووالده وخاله توفوا وأصحابه بيشتغلوا وبيتجوزوا.
“بعد أكثر من سبع سنين على اختفائه كل حاجاته لسه موجودة في البيت، ومع كل مناسبة بنجيبله هدوم جديدة ، في الاول كنا بنعمل حسابه في الاكل اللي بيحبه عشان لما يرجع ياكل منه معانا، ولسه بنجيبله البرفانات والشنط والحاجات اللي بيحبها عشان لما يرجع يستعملها. انا حابة اشوفه قدامي بس، اشوفه بعيني محدش يحكي عنه حاجة “