ضمن مخرجات حملة الزمن المسروق: بروفايل احمد خليل حسن عبد الحي
احمد خليل زوج وأب ل 5 أبناء ، كل حياته لبيته وأسرته وشغله، كان شغال وعنده ورشة لتجارة قطع غيار العربيات، كل الناس تشهد له بحسن الاخلاق والاحترام وأنه يساعد كل محتاج، احمد خليل مختفي قسريا عن اهله 3100 يوم.
المنطقة اللي كان احمد ساكن فيها تابعة لمحافظة العريس كان بيكون فيها تمركزات أمنية كثيرة كل اسبوع عشان التفتيش ودا كان مأثر على الأوضاع فكل حاجة، الشغل واقف ومكنش في مواصلات متاحة توصلنا لاي مكان ولا اي محافظة ، وكانوا بيجوا البيت كل اسبوع يفتشون البيت
زوجة احمد بتحكي اخر يوم كان أحمد موجود فيه معاها يوم اتنين بتاريخ 5 مارس 2018 ” كنا راجعين من المستشفى لاني كنت تعبانة وكنا راجعين من المستشفى وأحمد كان صايم، رجعنا على البيت كان في عربية امن مركزي عند البيت، دخلوا البيت وفتشوه واخدوا احمد واخواته الاربعة لقسم الشرطة ومنه للأمن الوطني وحققوا معاهم من غير اي اعتداءات أو أعمال عنف، بعد 14 يوم من الاختفاء القسري اخوات احمد ظهروا، لكن أحمد مرجعش لحد دلوقتي .ولما كان حد يخرج من الأمن الوطني يقول شوفنا احمد هناك ومن ساعتها منعرفش عنه اي حاجة.من يومها بنسأل في كل الأماكن والمراكز والأقسام في الأمن الوطني ولم يستدل على مصيره إلى الآن.”
8 سنوات و6 أشهر هو #الزمن_المسروق من حياة أحمد ومن اسرته وابنائه، من وقت اختفاء احمد خليل، ترك أبناءه في عمر صغير كانت أكبر أبنائه في نهاية المرحلة الابتدائية اصبحت الان في منتصف المرحلة الجامعية، وكان أصغر أبنائه ذات الثلاث سنوات أصبح الآن في نهاية المرحلة الابتدائية ،لم يعيشوا ذكرياتهم وحياتهم مع والدهم كما كان المفترض أن يكون، لم يشهد الاب علي جوازة ابنته الكبري ولم يشهد مع زوجته نجاحات ابناءهم وهما بيكبروا قدام عيونهم، ولا يسعد مع اخواته بجوازهم وخلفتهم ، لم يقاسمهم الاحزان ولا المناسبات المهمة.
بعد كل هذا #الزمن_ المسروق لسه كل حاجة مستنية احمد خليل لما يرجع الورشة بتاعته اللي كان نفسه يكبرها لسه موجودة ، واسرته واولاده مستنين رجوعه يقاسمهم الفرح والحزن.
زوجة احمد سايبه ليه رسالة ” نفسي يرجع واشوفه و اولاده يفرحو بيه ، والحياة تكمل بيه ، ولادي يفرحوا بابوهم ، اتمنى اليوم قبل بكرا يكون معانا ، ويكون بخير وصحة جيدة ويرجع بالسلامة يارب”
.طالبوا معنا السلطات المصرية لإجلاء مصير أحمد خليل وأكثر من 410 من المختفين قسريا بالتوقيع علي العريضة: tinyurl.com/disappearanc
#الزمن_المسروق
#اختفاء_قسري
#فين_احمد_خليل
