4758 يوم.. مسروقين من عمر عمرو وأهله .. عمرو ابراهيم متولى 

25 سنة وقت الاختفاء ، طالب هندسة معمارية ، على بعد خطوة واحدة بس من التخرج. 

في 8 أغسطس 2013، اختفى يوم احداث  الحرس الجمهورى وقتها صاحبة شهد انه كان موجود وكان مقبوض عليهم سوا  لانه عرف عمرو من صوته واتكلم معاه من وقتها.. ولسه  عمرومختفي لحد النهاردة.

عمرو مش رقم في قائمة. عمرو الشاب اللي كان بيضحك ويهزر مع الكل وبشوش ، وفي نفس الوقت أخوهم الكبير اللي حاسس بيهم كلهم من غير ما يقولوا كان عارف كل واحد بيحب ايه وبيكره اي ، كان حافظ قرآن ، ومحبوب من كل دفعته في الجامعة، خدوم بيساعد أي حد محتاج مساعدته. 

كان مدمن كورة، وليه مواعيد ثابتة كل خميس وجمعة يلعب فيها مع صحابه. حتى اختلاف الناس السياسي حواليه ما كانش بيفرق معاه، كان محبوب من الكل.

من يوم ما اتقبض عليه، عمرو غاب عن كل حاجة. غاب عن تخرجه وزمايله واصحابة ، والمشاريع اللي كان بيحضّرلها لسه محفوظة على اللاب توب بتاعه من غير ما تشوف النور. غاب عن إخوته وهم بيكبروا، اللي اتجوز فيهم واللي بقى عنده ولاد.. بقى عم من غير ما يعرف. وغاب عن أصعب لحظة، وفاة جدته اللي كانت نفسها تشوفه قبل ما تموت .

 الاخبار الي وصلت لعيلته كانت انه انتقل  في البداية لسجن وادي النطرون، وآخر معلومة وصلت لأسرته إنه محتجز في سجن العزولي.

لو عمرو كان لسه معانا، كان زمانه اتخرج، اشتغل في مجاله اللي كان متفوق فيه، وممكن يكون خطب أو اتجوز بالفعل.. وممكن كمان يكون عنده طفل أو طفلة، زي إخواته بالظبط. عمر كامل اتسرق منه، من غير ما يكون له ذنب غير إنه صاحب موقف.

سريره لسه موجود. هدومه لسه في دولابه. أخوه  كاان بيلبس منها اوقات عشان يحس انه معاه  جمبة   لحد ما أمه مقدرتش تتحمل ماقدرتش تستحمل انها تشوف حاجته  على غيره حتى لو اخوة  ،امه لسه مستنية لحد دلوقت لسه بتكتب عنه ولسه حاضر في كلامها وفي قلبها 

البيت كله متفق على حاجة واحدة: محدش يسمّي حد على اسم عمرو. مش عشان ينسوه.. عشان الاسم ده محجوز ليه هو وبس، لحد ما يرجع.

والبحث عن عمرو مكنش سهل ابدا ولا من غير تمن. أبوه استاذ ابراهيم متولي المحامي  دفع من عمره في السجن على مدار 10 سنين عشان بس بيدور عليه، ولحد دلوقتي لسه محبوس.. لأنه ببساطة رفض يسكت أو يوقف عن السؤال عن ابنه. 

يمكن يوم ما يرجع، مش هيبقى في كلام كتير. هيبقى بس حضن طويل أوي، وهقعد جنبه أتأمل فيه واملي عيني منه.. وأخيرًا يبقى موجود معانا.

4758 يوم من الانتظار. أسرة كاملة  مستنية إجابة واحدة: فين عمرو؟واب بيدفع تمن رحلة البحث دى من عمره وصحتة  في السجون علي مدار 10 سنين ولحد دلوقت.

“في البيت  لسة  حاجات عمرو  مستنياه  زى ما سابها مش عشان محدش لمسها بلعكس كان فايد بترعي وتحافظ علي كل حاجة  تخصه علي  امل يرجع يلاقيها .سريره زى مهو الاب بتاعة كمان مستنية مع مشاريعه وأحلامه  ،وهدومه في الدولاب  مطبقة ومكوية ،كل حاجة فيها بصمة إيده، وكل حاجة  منه بتفضل شاهدة إنه كان هنا، عاش هنا، وكل تفصيلة صغيرة فيها بتقاوم أثر الزمن في حضورها” . 

.طالبوا معنا السلطات المصرية باجلاء مصير عمرو متولي واكثر من 410 من المختفين قسريا بالتوقيع علي العريضة tinyurl.com/disappearanc 

#الزمن_المسروق 

#اختفاء_قسري

 #فين_عمرو

_____________