حق ومعرفة (14).. مشاركة الاعضاء,, أرواح على الأسفلت
***
شعر: محمود السيرة
الشابة اللطيفة الجميلة الرقيقة
نزلت ف يوم تدور ع الحقيقة
تشوف ليه ده بيحصل
اللي رايح مش مؤكد يوصل
واللي راجع بيقدم المشيئة
جريت للطريق.. ما هي كانت جريئة
مشيت ع الرصيف.. بخطوة بطيئة
سألت نفسها إزاي بس أقدر
أمنع حوادث إنها تحصل وتكتر
يارب اهديني للطريقة
عدى النهار واترمت ظلمة غميقة
صرير العجلات ف الليل يزيد الضيق ضيقة
طلع صوت منين متعرفشي
قال متخفيش، ردت إزاي مخفشي
دنا ف بحور الخوف غريقة
قال الصوت أنا روح طفلة بريئة
أو رضيعة عشان أبقى دقيقة
حادثة مخيفة خدتني أنا وماما
لما خبطتنا عربية فيها ناس ياما
اللي سايقها كان مشغول بمكالمة دنيئة
فرحان وبيضحك كان مستمتع بالخطيئة
سرحان مشفشي إشارة المرور المضيئة
لقيتني ف حضن أمي طايرين
وفوق الطريق جثتين صايرين
ياما ناس بتروح، وناس حرة طليقة
روح تانية اشتكت م الناس المسيئة
اللي بتطير.. مش بتسير
والفرق هي دقيقة
قالوا الجري نص الجدعنة
قلنا التأني كل الجدعنة.. والحرفنة
وأكيد هتودينا للعيشة الهنيئة
روح تالتة نادت: فيه طرق رديئة
مطباتها كتيرة
منحنياتها خطيرة
مفياش أمان .. ولا يفط بتبان
تحذر اللي عليها ماشي
يموت لو مشفهاشي
يا بلدي لازم تبقى بينا رفيقة
دانتي في التاريخ… الدولة العتيقة
حضارة بُنا وتشييد.. مد وتمهيد
طرق هنا وهناك.. تكتر وتزيد
علمك وفنك.. ظهر ع الارض
سكك ممدودة بالطول والعرض
وكنتي دايما لأهلك وناسك صديقة
يا بلاد طيبة.. كلك طيبة
زي ما انتي.. خليكي حبيبة
تحب ولادها وتأمنهم
حق ولادك.. كل واحد منهم
منذ بدء الخليقة
يخرج سالم.. ويرجع سالم
من غير حوادث بشعة وقميئة
وفي الحقيقة
المقولة المنيرة الوضيئة:
” لا بد أن تبقى الطرق بالأمان مليئة”
أكتوبر ٢٠٢٥
