ضمن مخرجات حملة الزمن المسروق: بروفايل طارق ابو بكر رشدان

طارق ابني  الوحيد ودايما بتجمعنا علاقة صداقة، وكان طيب وملوش في اي مشاكل خالص. في يوم 27 مارس 2020  تم استدعاء طارق عن طريق شيخ قبيلة في القرية تبع الجيش من الأهالي، وانا روحت معاه وسألته واحنا في الطريق انت عملت حاجة يا طارق ؟ قالي لا يا ماما معملتش اي حاجة.

الضابط وقتها قالي روحي وابنك هيكون عندك بكرا الصبح، انا مرضتش اروح في الأول وقلت لهم أنا عايزة ابني ومش هروح من غيره، بس في الاخر روحت من غيره وصدقتهم  وقولت هو ان شاء الله هيجي علي طول.وبعدها عرفنا انه راح كتيبة 101 بالعريش وكانت الأخبار بتوصلنا انه عايش وكويس لمدة سنة وبعد كدا انقطعت عنه الأخبار تماما ومعرفناش اي حاجة عنه.

من يوم اختفاء طارق فسريا عدى اكتر  من ست سنين.ومن وقتها وانا عملت كل المحاولات  تواصلت مع شيخ القبيلة ورحت كذا سجن في العريش والإسماعيلية والعاشر، وبعت تلغرافات واستغاثات ، لكن مفيش اي اخبار عنه خلال الست سنوات الاختفاء، ولا حتي في اي معلومة ايه الاتهام الموجه ليه عشان يختفي كل السنين دي كلها.

فجأة حياتنا انقلبت وابني مش موجود ومش عارفين عنه حاجة ولا هو عمل ايه ولا يستاهل يتحبس اصلا يوم واحد. #الزمن_المسروق من عمر طارق دلوقتي بقي عنده 25 سنه، وقت اختفائه كان طارق عنده 19 سنة كان زمانه اتخرج واشتغل وبقي جنبي وفرحت بيه وشوفته وهو بيكبر قدام عنيا، 

ملحقتش افرح بيه،  خدوه مني وهو لسه عيل ، كان شاب كويس جدا ومعملش اي مشاكل، احلى سبع سنين راحوا من عمره. حاجاته الشخصية لسه موجودة زي ما هي كتبه وهدومه وسريره فيه ريحته لحد دلوقتي، حتي تليفونه كان لسه جديد بقاله شهر ، كل يوم بقول هيرجع، انا ام ومستنية ابنها، مش بيغيب عني ولا ثانية ،اصعب شئ انك تفقد حتى من قلبك وروحك ومتعرفش عنه حاجه، الواحد كل ما يفكر في الموضوع يجيله شتات عقلي.

انا احساسي لما اشوفه دي حاجة متتوصفش، لما يبقي حضني حضني هو اللي هيقول، اكتر من الدموع معرفش اتكلم .احنا ناقصنا طارق ولا اي شي في الدنيا تعوض ، كل اللي حواليكي ميسواش انه تطمني عليه وتعرفي هو فين ، وفي امل طول مااحنا علي وش الدنيا .

طالبوا معنا السلطات المصرية لإجلاء مصير طارق أبو بكر رشدان  وأكثر من 410 من المختفين قسريا بالتوقيع علي العريضة tinyurl.com/disappearanc